સુરતના વરાછા વિસ્તારમાં રહેતા 26 વર્ષીય વિજય ડાંગોદરાને 19 મહિના પહેલાં પેરાલિસિસ અને શ્વાસ લેવામાં તકલીફ થતાં સ્મીમેર હોસ્પિટલમાં દાખલ કરવામાં આવ્યા હતા. ગંભીર હાલતમાં હોવા છતાં, સ્મીમેર હોસ્પિટલના ડોક્ટરોની ટીમ અને પરિવારની અથાગ મહેનતથી વિજયે નવજીવન પ્રાપ્ત કર્યું છે.
ગીર સોમનાથના ઉનાના ખાપટ ગામના વતની વિજય ડાંગોદરાને ગંભીર બીમારીને કારણે સંપૂર્ણ શરીરમાં પેરાલિસિસ થઈ ગયું હતું અને શ્વાસ લેવામાં પણ તકલીફ પડતી હતી. સ્મીમેર હોસ્પિટલના ડોક્ટરોએ તાત્કાલિક સારવાર શરૂ કરી અને ત્રણ મહિના સુધી વેન્ટિલેટર પર રાખ્યા બાદ નવ મહિના સુધી સઘન સારવાર આપી હતી. આ સમયગાળા દરમિયાન, તેમને લાખો રૂપિયાની દવાઓ અને સારવાર વિનામૂલ્યે આપવામાં આવી હતી.
સ્મીમેર હોસ્પિટલના ડોક્ટરોની ટીમ અને ખાસ કરીને ડો. દીપક શુક્લાની દેખરેખ હેઠળ, વિજયની તબિયતમાં ધીમે ધીમે સુધારો થવા લાગ્યો. નવ મહિનાની સઘન સારવાર અને ફિઝિયોથેરાપી બાદ, વિજય હવે ચાલી શકે છે અને તેની તબિયતમાં ઘણો સુધારો થયો છે. વિજયના પરિવારે સ્મીમેર હોસ્પિટલના ડોક્ટરો અને સ્ટાફનો આભાર માન્યો હતો.
